პასუხი: ძალიან კარგად მესმის თქვენი გულისტკივილის. სამწუხაროდ, საკმაოდ ხშირად გვაქვს საქმე ასეთ პრობლემებთან. მაგრამ იუმედობაში ყოფნა არ გმართებს. ჯერ ერთი, მხოლოდ სამი წლის დაოჯახებული ხარ და ყველაფერი წინ გაქვს. მეტი ლოცვისა და სიწმინდეების მოლოცვას გირჩევ. უფრო მეტად გააცოცხლე შენში სარწმუნოება. მუდამ იქონიე ღვთის იმედი და ყოველივე ღვთის ნებას მიანდე. ღვთის განგება ჩვენთვის ხშირად დაფარულია, რას გვასწავლის ღმერთი ამ განსაცდელით, რისი გამოსწორება გვმართებს, ეს არის ყურადსაღები.

   რაც შეეხება ხელოვნურ განაყოფიერებას. ეკლესია არ მიიჩნევს მართებულად ამის გაკეთებას. შევეცდები აგიხსნათ თუ რატომ. ხელოვნური განაყოფიერების დროს არა ერთი, არამედ უამრავი უჯრედი ნაყოფიერდება. ე.წ. ემბრიონი, უკვე განაყოფიერებულ უჯრედებს ნიშნავს, რომლებშიც ღვთისაგან ადამიანის უკვდავი სული მყოფობს. ხელოვნური ჩასახვის დროს ხდება "საუკეთესო" ემბრიონის ან ორი, მაქსიმუმ სამი ემბრიონის შეჩევა, რომლებიც რეალურად შეუძლია იტვირთოს და გააჩინოს ქალმა. დანარჩენებს უმოწყალოდ კლავენ. ბავშვი ან ბავშვები მძიმე ცოდვით იბადებიან: საკუთარი დედმამიშვილის მკვლელობის ხარჯზე.

   ღმერთმა დაგლოცოს და გაგამრავლოს ბუნებრივად! ხშირად თქვით აღსარება და ეზიარეთ.