ახალგაზრდებს,  რომლებსაც კვალიფიკაციის ასამაღლებლად საღვარგარეთ წასვლის სურვილი ჰქონდათ, ეუბნებოდა: - წადით, მაგრამ განათლების მიღების შემდეგ საბერძნეთში დაბრუნდით, რომ თქვენი ცოდნა მამულს მოახმაროთ.

***

  ახალგაზრდებმა უნდა იმეცადინონ, ისწავლონ. დღეს, წარმატებას რომ მიაღწიო, ორი დიპლომის ქონა და ორი უცხო ენის ცოდნაა საჭირო. მაგრამ, როცა სწავლას დაასრულებ, სულიერი აღმშენებლობისათვის უნდა იზრუნო.

***

  მშობლებმა, რომლებსაც განუვითარებელი ან დაუნი შვილები ჰყავთ, არ უნდა იდარდონ, რადგან მათი შვილები ცხონდებიან. მშობლებს უნდა უხაროდეთ, რომ მათი ბავშვები განსაკუთრებული შრომის გარეშე მოხვდებიან სამოთხეში. ასეთი რწმენით სავსე მშობლებისათვის სულიერი ჯილდოა გამზადებული.

***

  ვაჭრები არიან კეთილები და ბოროტები, პატიოსნები და მპარავნი. პატიოსნები არავის ატყუებენ და კარგ საქონელს დაბალ ფასად ყიდიან. სხვები ბევრს იტყუებიან და თავხედები არიან. პატიოსან ვაჭარს თავიდან ყურადღებას არ აქცევენ და მისი მაღაზია დახურვის პირასაა. მაგრამ ღვთის ნებით ყველაფერი იცვლება: კეთილი ვაჭარი ღვთის კურთხევით, წარმატებით აგრძელებს თავის საქმეს, სხვები კი კოტრდებიან.

***

  რბილსხეულობა ერთ-ერთი მთავარი მიზე­ზია დღევანდელი ახალგაზრდობის სულიერი და ფიზიკური არანორმალურობისა.

***

  ერთი ახალგაზრდა თავს არიდებდა არმიაში სამსახურს. მან ეს ბერთან აღიარა. ბერმა უთხრა:

 - კურთხეულო, 1940 წელს, ომში, ელი­ნები ერთმანეთს ეცილებოდნენ წინა ხაზ­ზე საბრძოლველად. ახალგაზრდები უკან ექაჩე­ბოდნენ ხანშიშესულებს და ეუბნებოდნენ: თქვენ ოჯახები გყავთ, წინ ჩვენ გაგვიშვით, თქვენ კი უკან მოგვყევითო. შენ კი არმიაში წასვლა გიჭირს!

  მაშინ ახალგაზრდა დაჰპირდა ბერს, რომ არმიაში წავიდოდა და ყველაზე ძნელ და რთულ სახეობაში - სადესანტო ჯარებში იმსახურებდა.

***

  დღეს, ბერებშიც კი, ამა სოფლის სული მეფობს. საერთოდ არ ზრუნავენ თავიანთ სულიერ ღვაწლზე, მხოლოდ ამ სოფლიურზე ფიქრობენ, და რაც ყველაზე ცუდია, ამით ამაყობენ, ზოგი რადიო-ტელეფონით დადის, სხვები მშენებლობაში ჩაფლულან, ბევრმა ვინც ერში სწავლობდა და ღვთისმეტყველება შეისწავლა, აქ დაუტევა სულიერი ღვაწლი და შეძენილი ცოდნა, მანქანებით არიან გატაცებულნი და ცდილობენ ერმანეთს გაუსწ­რონ. სულიერი ღვაწლი, რისთვისაც ეს სოფელი დაუტევეთ ჩვენ არ გვაინტერესებს.

  დღეს ფსიქიატრიული საავადმყოფოები და ციხეები სავსეა, ეს კი კარგი მოძღვრის უკმარისობაზე მიუთითებს.

***

  სულიერი მოძღვრის ჭეშმარიტი სულიერი მდგომარეობის მაჩვენებელია ის, რომ თავისი თავის მიმართ ძალიან მკაცრია, ხოლო სხვების მიმართ _ ფრიად შემწყნარებელი, და, როგორც წესი, ეკლესიის კანონებს სხვების წინააღმდეგ არ იყენებს.

***

  ჩვენ არ უნდა დავემორჩილოთ განურ­ჩევლად ყველას. ბევრი ეპისკოპოსი მეუბ­ნება: "შეკრული ხარ ჩვენი მღვდელმთავრობით, როდესაც სოფელში გამოხვალ, მოდი ჩემს მიტროპოლიაში". თუკი მე მათ დავემორ­ჩილები, ვერასოდეს დავბრუნდები წმინდა მთაზე.

***

  მოძებნე კარგი სულიერი მოძღვარი, თქვი აღსარება, რათა შეუერთდე ეკლესიას და ყველაფერი კარგად იქნება.

***

  საუკეთესო საქმიანობა _ კარგი გულისთქმების გამომშვები ფაბრიკის გახსნაა.

***

  _ ღერონდა, გამუდმებით მძინავს. რა მეშველება?

  _ ნუ ღელავ, კურთხეულო, რაც მეტია ძილი, მით ნაკლებია გულისთქმები და ცოდვები.

***

  ილოცე განუწყვეტლივ და იზრუნე სულიერი ღვაწლისათვის.

***

  დიდი ეგოიზმია ფიქრობდე, რომ სხვების გამოსწორება შეგიძლია.

***

  დიდება შენდა ღმერთო! დიდება შენდა ღმერთო! სადიდებელით: "დიდება შენდა ღმერთო!" იდევნებიან დემონები.

 

წიგნიდან: "ბერი პაისი"