ახალ დროების პირმშო - ახალი ადამიანია. მისი მახასიათებელი განდგომილების სულისკვეთებაა, რომლის შესახებაც არაფერი იცის. იგი ურწმუნოა, თუმცა ესეც არ იცის. რატომ არ იცის მისი რეალური სულიერი მდგომარეობა ადამიანმა? იმიტომ, რომ ამ სიმართლეს ეკლესიაში, ძალიან მოხერხებულად, მოდერნისტი უმალავს. 

   მოდერნისტებს არ აწყობთ, რომ მართლმადიდებლებმა განარჩიონ მორწმუნე ურწმუნოსაგან, ანუ მართლმადიდებლებმა საკუთარი თავი მოდერნისტებისგან გამიჯნონ.

   "მოდერნისტების ინტერესებშია, რაც შეიძლება დიდხანს შეინარჩუნონ ერთიანობის ილუზია და დაარწმუნონ ყველა, ვინც მათ მოუსმენს, რომ მართლმადიდებლებისა და მოდერნისტების შერწყმა ქრისტეს ეკლესიის ჭეშმარიტი და კურთხეული ერთობაა" (რ.ვერშილო).

   სინამდვილეში, ეს არის ქრისტიანობისაგან განდგომილება, ეკლესიის გამიწიერება, ქრისტესთან ჭეშმარიტი ერთობის დარღვევა და დაკარგვა. ამ გზით მოდერნისტს კიარ მოყავს ადამიანი ეკლესიაში, პირიქით აშორებს მათ და ცრუ რეალობაში ამყოფებს მათ.

   მოდერნისტს არც აწყობს, მრევლმა ეკლესიაში სუფთა მართლმადიდებლობა ისწავლონ. მაშინ ხომ მათი მზაკვრობა გააშკარავდება. ამიტომ მათ არსენალში: წიგნებში და საუბრებში მხოლოდ "ამსოფლიური მართლმადიდებლობაა".

   რეალური სურათი მაინც არ იმალება. "საქმემან გამოგაჩინონ" - ყველაზე ზუსტი შეფასების პრინციპია. რაც არ უნდა "ქაჩო" ადამიანი ეკლესიაში, თუ არა ღვთის მადლი, ის ეკლესიის ორგანიზმის წევრი ვერ ხდება. თუმცა ფორმალურად ორგანიზაციის წევრად შესაძლოა დარჩეს. 

   მოდერნისტი კი არ გამოირჩევს ეკლესიის შვილს, არამედ ღმერთი გამოირჩევს მას. ღვთისგან რჩეული ადამიანი კი ჭეშმარიტ მართლმადიდებლობას, არაამსოფლიგანობას ეძიებს სამყაროში და არა მოდერნიზირებულ, გამიწიერებულ სულისკვეთებას, რომელშიც ის უკვე იმყოფებოდა. 

   მოდერნიზმის ფუნქციაც სწორედ ეს არის - დააჯეროს ახალი ადამიანი, რომ შინაგანი ცვლილებების, ცოცხალი სარწმუნოების გარეშეც ის მორწმუნეა და ცხონებულიც კი. ილუზიური ერთობაც შედგა. ამ "ერთობას" მხოლოდ მართლმადიდებელი უშლის ხელს. 

   ეს არის ტრაგიზმი, რომლის აღიარება არ გვსურს. ეს არის ილუზია, რომელშიც გვამყოფებს მოდერნიზმი. 

დავით ჯინჭარაძე

www.xareba.net - ის რედაქცია