ახალი ბაბილონის გოდოლი - დავით ჯინჭარაძე
ბოლო ათწლეულების განმავლობაში წინა პლანზე წამოვიდა ახალი ფილოსოფიური კონცეფცია სახელად - ტრანსჰუმანიზმი. ეს არის პოსტმოდერნისტული ფილოსოფიური სისტემა, რომელიც ორიენტირებულია ინდივიდზე და მიისწრაფვის ჰუმანური ადამიანიდან მეტაჰუმანურ, ანუ ზეადამიანზე გადასვლას. ჩვენთვის მნიშვნელოვანია ამ საკითხის გარკვევა, რადგან ეს იდეოლოგია კაცობრიობის სრულ ტრანსფორმაციას ისახავს მიზნად..
ტრნსჰუმანიზმი ჩვეულებრივ გაგებულია, როგორც ადამიანის განვითარების გარდამავალი, ევოლუციური ეტაპი, სანამ ის მიაღწევს საბოლოო სტადიას - მეტაჰუმანიზმს. არსობრივად შემდეგ თანმიმდევრობას ვხედავთ: ჰუმანიზმი-ტრანსჰუმანიზმი-მეტაჰუმანიზმი (ზეადამიანი).
ამ იდეოლოგიის მიზანია უკვდავების მოპოვება . მათი აზრით უკვდავების შესაძლებლობა მიიღწევა ადამიანის ტვინის ელექტრონულ კომპიუტერთან დაკავშირებით და ადამიანის მე-ს მინიმუმ ერთი ციფრული ასლის შექმნით. ამრიგად, საუბარია ადამიანის ეტაპობრივ გადასვლაზე ბიოლოგიური, ჰუმანური არსბიდან წმინდა ტექნიკურ/რობოტ ადამიანზე. ამ მოძრაობის მხარდამჭერები თვლიან, რომ კაცობრიობის ევოლუციის ბუნებრივი კანონი მისი მანქანად გარდაქმნაა.
ტექნოლოგიური შესაძლებლობების გამოყენებით, თანამედროვე ადამიანი ცდილობს შეცვალოს საკუთარი ონტოლოგია, ჩაერიოს ადამიანის ბუნებაში, ღვთისგან შექმნილ ადამიანზე უკეთესი გახადოს იგი, დაჯილდოვდეს ფიზიკური და გონებრივი შესაძლებლობებით, რომლებიც სცილდება მის ბუნებრივ ნორმას. შედეგად, გააუქმოს სიბერე და სიკვდილი. ფაქტობრივად ეს ნიშნავს ღვთისგან შექმნილი ძველი ადამიანის დასასრულს.
ცხადია, თუ ტრანსჰუმანიზმი გაიმარჯვებს, ჰუმანიზმი შეწყვეტს დომინანტურ ფილოსოფიად ყოფნას, ვინაიდან ადამიანობა არსებითად განსხვავებულ ფუნქციებს და თვისებებს შეიძენს. ხელოვნური ინტელექტის მეშვეობით შეიცვლება ადამიანის ძირითადი მახასიათებლები როგორიცაა: თვითშემეცნება, თავისუფალი ნება და ემოციური მდგომარეობის გამოხატვა, კორექტირება მოხდება ადამიანის ეთიკურ და კულტურულ საფუძვლებში და ნორმებში. სარწმუნოებაზე კი საუბარიც ზედმეტია.
ჩვენს თვალწინ ყოველდღიურად ცხადდება ხელოვნური ინტელექტის შესაძლებლობები. ახალ ადამიანს თითქოს სიამოვნებს იყოს არარაობა ხელოვნური ინტელექტის წინაშე. მან უკვე გააღმერთა იგი, მას ყოველდღიურად რჩევისთვის მიმართავს, მათ შორის სულიერების საკითხებზე. კაცობრიობის უმრავლესობამ, რომელსაც არ გააჩნია ჭეშმარიტი ღმერთის რწმენა მიიღო ხელოვნური ინტელექტი როგორც უალტერნატივო საშუალება -"ჭეშმარიტება”. ამ კუთხით ის რელიგიის ჩანაცვლებასაც ცდილობს, მით უფრო, რომ არ უარყოფს მეტაფიზიკურ მოვლენებს. თუმცა, ფოკუსირებას უფრო კოსმოსურ ენერგიაზე, უცხოპლანეტელებზე და გაუგებარ ზეძალებზე აკეთებს.
ხელოვნური ინტელექტის საშუალებით მიმდინარეობს ტრანს-ადამიანის სრული და სწრაფი ჩამოყალიბება. ჩვენს თვალწინ მიმდინარეობს ჰუმანისტური ღირებულებების ნგრევა,რაც ესოდენ პოპულარული იყო გასულ საუკუნეებში. ანუ ადამიანობა ჩვეული გაგებით კვდება. ადამიანებს აღარც სურთ ძველი ჰუმანისტური ღირებულებებით ურთიერთობა. ამიტომ ყველგან შეინიშნება რადიკალიზაცია, მოურიდებლობა და უგულობა. ახალი მეტაჰუმანური ადამიანი გამოირჩევა რადიკალური რიტორიკით, ძველი წესების და ღირებულებების დაჩქარებულად ნგრევის სურვილით ნებისმიერ სფეროში, განსაკუთრებით კი სარწმუნოებრივში.
სინამდვილეში, თანამედროვე ტრანსჰუმანისტები ახალს არაფერს ქმნიან. ისინი უბრალოდ ცდილობენ ააშენონ ახალი ბაბილონის გოდოლი და დაიმკვიდრონ „სამოთხე". გახდნენ „ღმერთები".ეს ძველი ბაბილონის მშენებლები იყენებდნენ თავიანთი დროის ტექნოლოგიას, აგურს, ქვას და თიხას, ხოლო ახალი გოდოლის მშენებლები - ხელოვნურ ინტელექტს, გენურ ინჟინერიას და სხვა თანამედროვე ტექნოლოგიებს.
დიდი სიბრძნე არ არის საჭირო იმის გასაგებად, რომ კაცობრიობის მომავალი არა მხოლოდ ბნელი, არამედ უკიდურესად დრამატული იქნება!
ათეისტური ჰუმანიზმის ბუნებრივი ევოლუცია, რომელიც ღმერთისგან ადამიანის განშორების პირველ, შერბილებულ მცდელობას წარმოადგენდა, ასრულებს თავის ფუნქციას.
დაწყებულია ადამიანის დეჰუმანიზაციის სწრაფი პროცესი. მანქანები ცვლის ღმერთს და თავად ადამიანს. საკითხავია: როგორი იქნება ჩვენი პოზიცია ამ ახალი მწარე რეალობის წინაშე?!
ხოლო, ძველი ბაბილონის გოდოლს და მშენებლებს რა დაემართა ჩვენ კარგად ვიცით!
დავით ჯინჭარაძე
www.xareba.net - ის რედაქცია
მობ: 591 97 04 90
2012 Xareba.net
2012 Xareba.net
Сайт работает под управлением DataLife Engine