„წესი კეთილ არს ყოვლისავე, რომელი იწყებდეს სიტყუასა გინა საქმესა, რაითა ღმრთისაგან იწყოს და ღმრთისა აღასრულოს, ვითარცა ღმრთისმეტყველი გრიგოლ იტყვის, ვითარმედ: „დასაბამ და დასასრულ ყოვლისა საქმისა და სიტყვისა შენისა ღმერთი იყავნ". აწ უკუე ჩუენცა ღმრთისმსახურებასა და მართლაღსარებასა სარწმუნოებისასა ხმამაღლად ვქადაგებთ, რომელსა ზედა ეკლესიაი ქრისტესი დაფუძნებულ არს და დღითი-დღე აღორძინდების და აღემატების უფროის ნაძუთა მათ ლიბანისათა. ამას საფუძველსა ზედა წმიდისა ქრისტეს სახარებისასა და ცხოველმყოფელთა მათ მცნებათა მისთასა ჩუენ ყოველნი მართლმორწმუნენი მტკიცე ვართ და ესრეთ განვაჩინებთ და ვიტყვით, რაითა ვითარცა ზემოწერილ არს შეურყევლად დამარხვა მართლისა მის სარწმუნოებისა, რომელი ქადაგეს წმიდათა მოციქულთა და გუასწავეს ღმერთშემოსილთა მამათა, ეგრეთვე წესნიცა და კანონნი მათ მიერ განწესებულნი მტკიცემცა არიან და შეურყეველ" [2, გვ. 23].

* * *

   „ყოველთა მართლმადიდებელთა და მართლგამომეტყუელთა სიტყუასა მას ჭეშმარიტებისასა მიეცინ უფალმან ღმერთმან მადლი მისი და კურთხევაი. და საუკუნომცა არს სახსენებელი მათი მეოხებითა ყოვლად წმიდისა დედუფლისა ჩუენისა ღმრთისმშობელისა და მარადის ქალწულისა მარიამისითა და ყოველთა წმიდათათა, ამენ" [2, გვ. 68].