ქრისტიანი ახალგაზრდობის უმეტესობა მუსიკის ერთგული უფროა, ვიდრე ქრისტესი

   ცნობილია, რომ როკ-მუსიკა გამოჩენისთანავე მეამბოხური სულისკვეთებისა იყო. იგი თავიდანვე ამხედრებდა ადამიანს მშობლებისა და საზოგადოების წინააღმდეგ. ახლა კი ზოგიერთი როკ-ჯგუფი ღიად მოუწოდებს ტრადიციული ქრისტიანული პრინციპების უარყოფისაკენ.

   ალ. მენკონი, როკ-მუსიკის სპეციალისტი ამტკიცებს: „ძალიან სამწუხაროა, რომ ქრისტიანი ახალაგაზრდობის უმეტესობა, რომლებთანაც მე მიწევს ურთიერთობა, მუსიკის ერთგული უფროა, ვიდრე ქრისტესი. მუსიკა თანამედროვე თაობის ენაა... თანამედროვე თაობა უბრალოდ კი არ უსმენს მუსიკას, ის ღრმად განიცდის მას. მუსიკა მათი ცხოვრების შემადგენელი ნაწილი ხდება".

   მიკ ჯაგერი, „როლინგ სტოუნზის"-ის მომღერალი ამბობს: „არ არსებობს უვნებელი, ოჯახზე ორიენტირებული როკის სიმღერა". ყველაზე პოპულარული სიმღერიდან 50%-ში ლაპარაკია მკვლელობაზე, 35%-ში სატანიზმზე, 17%-ში კი - თვითმკვლელობაზე.

   შედეგიც სახეზეა: ქალაქ ჯეფერსონ-ტუანშიპში, ნიუ-ჯერსის შტატში, ყმაწვილმა თომა სილოვანმა საკუთარი სახლის სარდაფში დანით განგმირა თავისი დედა ბეტტი ანნი. სახლის დაწვის მიზნით მან ცეცხლი მოუკიდა დივანს, რათა ამ გზით მოეკლა თავისი მამა და უმცროსი ძმა, შემდეგ გარეთ გამოიქცა და ხელებზე ვენების გადაჭრით თავი მოიკლა. მთელი კვირა დანაშაულის ჩადენამდე თომა ღიღინებდა როკ-სიმღერას სისხლსა და დედის მკვლელობაზე. მოგვიანებით პოლიციამ გაარკვია, რომ თომა ნიჭიერი სტუდენტი, შესანიშნავი სპორტსმენი და სკაუტი იყო, შემდეგ ის როგორღაც გაიტაცა „მძიმე მეტალმა". დანაშაულის ჩადენამდე მან თავის მეგობრებს გაუმხილა, რომ მას სატანა გამოეცხადა და უბრძანა თავისი ოჯახის ამოხოცვა.

თვითმკვლელობა სატანის სახელით

   როკ-მუსიკის ზოგიერთი კომპოზიტორი თვითმკვლელობას ქადაგებს. სიმღერაში "Suicide’s alternative” ნათქვამია: მე მომბეზრდა სიცოცხლე - ის აუტანელია. მე დათრგუნული ვარ და დავიღალე - არავის ანაღვლებს ეს. მე მეზიზღება საკუთარი თავი - არ მინდა სიცოცხლე. მომბეზრდა სიცოცხლე - დროა სიკვდილისა. თვითმკვლელობა - აი გამოსავალი. შესწირე სიცოცხლე და ჩაიდინე თვითმკვლელობა. სატანის სახელისათვის თუ იზამ ამას, იქნები უკვდავი, როგორც ისაა. - ესაა ნათქვამი „მძიმე მეტალის" ჯგუფის მიერ ლუციფერისადმი მიძღვნილ სიმღერაში.

   ახალგაზრდობის დაწვრილებითი გამოკითხვის შედეგად დოქტორმა ვოზმა დაასკვნა, რომ ძალიან მნიშვნელოვანია მშობლებმა თვალყური ადევნონ, თუ რას უსმენენ მათი შვილები და ყურადღება მიაქციონ მათ მიერ გამოვლენილ ნებისმიერ არანორმალურ სიმპტომებს.

   მსგავსი გამოკითხვის შედეგად საზოგადოება "Nacional Association”-მა დაასკვნა, რომ წელიწადში დაახლოებით 6000 ახალგაზრდის თვითმკვლელობა გამოწვეულია ნიჰილისტური და ფატალისტური მუსიკის ზეგავლენით.

როკი სტიმულს აძლევს ნარკოტიკების მოხმარებას

   სექსისა და ძალადობის გარდა, როკ-მუსიკა ხელს უწყობს ნარკოტიკების გამოყენებას. „Fost Medicine”-ს ერთ-ერთი გამოკვლევის დასკვნაში ნათქვამია: ფაქტები გვიდასტურებენ, რომ როკ-მუსიკა, როგორც წესი, სტიმულს აძლევს ნარკოტიკების მოხმარებას, გაურკვეველ სექსუალურ კავშირს და გაშმაგებულ მოქმედებას.

   „ეს მუსიკა ცეცხლში ბენზინის ჩამატების მსგავსია, რომელიც სიძულვილითა და გაბოროტებით იწვის" - თქვა ტენესის უნივერსიტეტთან არსებული ბავშვთა ფსიქიატრიის კლინიკის პროფესორმა პაველ კინგმა. კინგის სიტყვით, მისი ახალგაზრდა პაციენტების 80% ყოველდღიურად უსმენდა „მძიმე მეტალის" მუსიკას.

დაკანონებული გარყვნილება

   ფაქტები გვიჩვენებენ, რომ როკ-მუსიკა სტიმულს აძლევს სქესობრივ გარყვნილებას. ჟურნალ "As Nius Veldrefort"-ის მიხედვით 1990 წლის მარტისათვის არსებობდა 13 როკ-ჯგუფი, რომლებსაც მამაკაცის სასქესო ორგანოების სახელები ერქვა, ექვსს - ქალთა სასქესო ორგანოებისა, ოთხს - სიტყვა სპერმის სხვადასხვა ვარიანტის სახელი, რვას - აბორტთან დაკავშირებული სახელი, ათ ჯგუფს სხვადასხვა სექსუალური აქტის საპატივცემულო სახელი ერქვა, ხოლო რვა თავის დასახელებაში შეიცავდა დედის საგინებელ სიტყვებს. ადვილი წარმოსადგენია, როგორი ცვლილებები მოხდებოდა „ამ მიმართულებით" განვლილი დროის განმავლობაში!

   თანამედროვე როკ-მუსიკა გაჯერებულია ქორწილის გარეშე კავშირის, მეუღლეობრივი ღალატის, სადიზმის, მაზოხიზმის, ჰომოსექსუალიზმის, გაუპატიურებისა და ნეკროფილიის ელემენტებით. ხშირად როკ-სიმღერები ნებისმიერ პიროვნებასთან სექსისაკენ აქეზებენ. ნათელია, რომ როკ-ენ-როლის უმეტესი კომპოზიტორების ნაწარმოებებში გარყვნილება შელამაზებულია და წარმოდგენილია როგორც მიმზიდველი რამ.

   შეიძლება შევნიშნოთ, ბოლო დროს როგორ გადაედინება მსგავსი როკ-სიბილწე პოპ-მუსიკაში და ამ სახით მუსიკის განუყოფელი ნაწილი ხდება.

როკი დომინირებს ახალგაზრდობის მსოფლმხედველობასა და ქცევაზე

   მშობლებმა არ უნდა დატოვონ უყურადღებოდ მათ შვილებზე როკ-მუსიკის უდიდესი გავლენა. ადამიანის ფასეულობათა სისტემა ხომ ახალგზარდობისა და სიყრმის პერიოდში ყალიბდება.

   მართლმადიდებელთათვის ნათელია, რომ ღვთის გმობა, უხამსობა, გარყვნილება და ძალადობა, რომლებსაც თანამედროვე როკ-მუსიკა ქადაგებს, ადამიანთა ხსნის შესახებ ღვთის ნების საწინააღმდეგოა.

„შეუძლებელი კაცთაგან, შესაძლებელ არს ღვთისა მიერ"

   თანამედროვე მძაფრი მუსიკის პრობლემა გვიჩვენებს თანამედროვე საზოგადოების უფრო ღრმა სენს. შესაძლოა, როკ-სიმღერების მოწოდება იმიტომ იზიდავს ახალგაზრდობას, რომ ისინი ვერ ხედავენ ცხოვრებაში ამაღლებულ ორიენტირებს და არ სჯერათ უფროსი თაობის იდეალებისა. ამ მუსიკით ისინი გამოხატავენ პროტესტს თავისი მშობლებისადმი, რომელთა რწმენაც მათ დაკარგეს. ამ თვალსაზრისით მშობლებმა სერიოზულად უნდა შეაფასონ, თუ რამდენად შეესაბამება მათი ოჯახის ცხოვრების წესი ქრისტიანულ სწავლებას. რელიგიურად ლოცულობს თუ არა ოჯახის ყველა წევრი ღვთისადმი. დადიან თუ არა ტაძარში, ეზიარებიან თუ არა, იცავენ თუ არა მარხვებს, საუბრობენ თუ არა ღმერთზე? თუ ეს ასე არ არის, მაშინ აუცილებლად გაუჩნდებათ ბავშვებს სულიერი სიცარიელე, რომელსაც ისინი შეავსებენ იმით, რაც კი შეხვდებათ გზაზე. რა თქმა უნდა, გარემოს გავლენა ძალიან დიდია, ხშირად მშობლები უძლურნიც აღმოჩნდებიან მის წინაშე. მაგრამ სასოწარკვეთა არ შეიძლება. ღიად, გულახდილად უნდა ვისაუბროთ ბავშვებთან თანამედროვე პრობლემებზე და უნდა ავუხილოთ თვალი იმაზე, რაც ემუქრება მათ. მთავარი კი ღვთისადმი ლოცვაა, რათა მან თავისი გზებით მიიყვანოს ისინი ცხონებამდე, რამეთუ "შეუძლებელი კაცთაგან, შესაძლებელ არს ღვთისა მიერ!"

Xareba.net - ის რედაქცია