განა ისინი ქრისტიანები არიან და თანაც მართლმადიდებლები, რომელთაც არ იციან, პატივს არ მიაგებენ და არც თაყვანს სცემენ ქრისტიანულ ჯვარს (მართლმადიდებლური გამოსახულებით), მარხვასა და ქრისტიანულ დღესასწაულებს?

ესენი არიან ქრისტიანები, რომლებიც უსირცხვილოდ თელავენ მართლმადიდებებლი ეკლესიის ყველა კანონს და უდიდესი დღესასწაულების წინ და მარხვაში ეძლევიან არა მარტო უსირცხვილო სიმღერებსა და ცეკვებს, ხმაურიან, მკრეხელურ საუბრებს, სიძვის აღმძვრელ სანახაობებს, სხვადასხვა სახის აზარტულ თამაშობებს, უაზროდ დანაყრებასა და თრობას, არამედ სხვა საშინელ და სასირცხვილო საქმეებსაც?

ესენია ქრისტიანები და თანაც მართლმადიდებლები, რომელთაც არ იციან რომელ სარწმუნოებას მიეკუთვნებიან და რისთვის ცხოვრობენ ამქვეყნად? რატომ ეძახიან მათ ქრისტიანებს, მართლმადიდებლებს; რომელთაც არცერთი ლოცვა არ იციან. მათ ისიც კი არ იციან, ვინ არის ქრისტე მაცხოვარი, რაა ეკლესია და რომელია მისი საიდუმლოებები; არ იციან პირჯვრის გადაწერაც კი და არც ის, რა არის ჯვარი და მისი მნიშვნელობა; რომლებიც არა თუ აღსარებასა და წმ. ზიარებაზე რამოდენიმე წელია არ ყოფილან, არამედ საერთოდ ღვთის ტაძარშიც არ არიან ნამყოფნი? არა, ესენი ქრისტიანები არ არიან. ესენი სიტყვითაც და საქმითაც უღმერთოები არიან.

მაშ ასე, მართლმადიდებელო ქრისტიანებო, აღიარეთ თქვენი უძლურება რწმენისა და კეთილმსახურების საქმეში; საკუთარი არკეთილსინდიდიერება ღვთის წმინდა მცნებათა და იმ მართლმადიდებელი ეკლესიის კანონების შესრულებაში, რომელსაც როგორც დედას, ჩვენ ასე ხშირად შეურაცხვყოფთ ჩვენი ურჩობით. ამის შემდეგ შეეცადეთ შეძლებისდაგვარად შეცვალოთ თქვენი ცხოვრება ახალი, უკეთესი ცხოვრებით ქრისტეში. სადაც დაინახავთ საკუთარ უძლურებას, მიმართეთ გულითადი ლოცვით ღმერთს. სთხოვეთ მას რწმენით და ღრმა თავმდაბლობით ყველაფერი, რაც გჭირდებათ და სასარგებლოა თქვენთვის - ითხოვეთ და მოგეცემათ.

მორწმუნისათვის ყველაფერია შესაძლებელი, თუმცა არა უცებ, არამედ ნელ-ნელა, თანდათანობით. შეისწავლეთ და მიეჩვიეთ საღვთო კანონის შესრულებას საქმით, სიტყვითა და გონებით. მტკიცედ დაიცავით წმინდა ეკლესიის სწავლება.

იმავეს მიაჩვიეთ თქვენი ოჯახის წევრები. დაიწყეთ პირჯვრის სწორი გადასახვით, საოჯახო და საეკლესიო ლოცვების აუცილებელი შესრულებით. განაწყვეთ თავი და სხვებიც ღვთის ტაძარში ხშირი სიარულისათვის, მარხვების მკაცრად დაცვისათვის და უდიდესი საეკლესიო დღესასწაულების მიმართ პატივისცემით. ჭეშმარიტი გზიდან აცდენილი ცოდვილის მომქცევის იხსნის მასაც და თავის თავსაც. მხოლოდ ერთობლივი მოქმედებითაა შესაძლებელი ჩვენს შორის დაკნინებული წმიდა მართლმადიდებლური სარწმუნოების აღორძინება.