ყარლაგის აკმოლინსკის 26-ე სპეც. განყოფილება 1937 წლის 3 დეკემბერს შეიქმნა. ეს განსაკუთრებული ბანაკი იყო ქალებისათვის, რომელსაც „ალჟირი" (алжир – Акмолинский женщин изменников Родины) ეწოდებოდა. საბჭოთა ხელისუფლების 15. 08. 1937 წ. ცნობილი ბრძანებით №00486 საფუძველი ჩაეყარა ქალების მასობრივ რეპრესიებს, რომელიც ეგრეთწოდებული „სამშობლის მოღალატე ოჯახის წევრების" წინააღმდეგ იყო მიმართული.

 ცენტრალურ ყაზახეთში საბჭოთა ხელისუფლების მოსვლისთანავე დაიწყო ეკლესიის დევნა. 30-იან წლებში ყარაგანდის მიდამოები ფაქტობრივად ყარაგანდელი სპეცგადასახლებულებისა და აღმსარებლების სისხლით მოირწყო.