მართლმადიდებელი ეკლესიის წიაღში მყოფი ადამიანი, როგორც წესი, შინაგანი გამოცდილებით ხვდება, თუ როგორ ტანსაცმელი უნდა ჩაიცვას. დაკვირვება გვიჩვენებს, რომ ჭეშმარიტი ეკლესიური ადამიანი არ წარმოაჩენს თავის "მართლმადიდებლობას".

  ისმის კითხვა: შეიძლება მართლმადიდებელი ადამიანი იყოს მოდის მიმდევარი?

  ცხოვრების ყოფითი საქმეები ძლიერად მოქმედებს ჩვენს შინაგან მდგომარეობაზე. ამიტომ, ტანსაცმელი ადამიანის მხოლოდ გარეგნული გამომეტყველების საშუალება არაა. მაგალითად, თუ გოგონას თმები მწვანედ აქვს შეღებილი, არა მგონია, მისგან ზნეობრივ მოქმედებას უნდა ველოდოთ.

   გამომწვევი ჩაცმულობა ახშობს სირცხვილის გრძნობას და მრუშულ აზრებს აღვიძებს, აღვივებს.

  ზოგიერთი ქალი ფიქრობს, თავისი გამომწვევი ჩაცმულობით მხოლოდ სხვაზე მოქმედებს, სინამდვილეში კი ასეთი ჩაცმულობა მასაც აღაგზნებს. მცირე დანაშაულიც არ რჩება დაუსჯელი, მით უფრო ასეთი განწყობილების მქონე ქალის ქცევა.

  მიგვაჩნია, რომ სულიერი ცხოვრების ერთგული ქალი გრძელი, სრული კაბით, უბრალო ვარცხნილობით, უსამკაულოდ და უფერუმარილოდ ივლის, არა იმიტომ, რომ შეიცნონ მისი წრის ადამიანები, არამედ იმიტომ, რომ ასეთი ჩაცმულობა მას არ შეუშლის ხელს სულიერ ცხოვრებაში. შეუძლებელია ბოლომდე გამოხატო ადამიანის შინაგანი ცხოვრება, ხოლო მოდა არა საკუთარი თავის შეცნობას, არამედ გარეშე მყოფების მიზიდვას ემსახურება. მართლმადიდებელი ადამიანისათვის დამახასიათებელია შინაგანი ცხოვრებით ცხოვრება. მაგრამ, ამავე დროს, ის გარეგნულად თვალშისაცემად არ უნდა განსხვავდებოდეს სხვისგან, რათა ერთის მხრივ, არ გახდეს ცნობისმოყვარეობისა და დაბრკოლების ობიექტი, ხოლო მეორეს მხრივ _ თავად არ ჩავარდეს ამპარტავნებაში და თვითკმაყოფილებაში. რწმენა _ შინაგანი, სულიერი საქმეა, ის არ საჭიროებს აფიშირებას. მოგეხსენებათ, რომ გარეგნული, თვალთმაქცური, ფარისევლური მოქმედების წინაღმდეგ არა ერთხელ საუბრობდა მაცხოვარი.

  ქრისტიანს უბრალო სამოსი უნდა ეცვას, რომელიც მუდამ სუფთა და მოწესრიგებული უნდა ჰქონდეს. ასეთივე სუფთა და მოწესრიგებული უნდა ჰქონდეს სხვა ფიზიოლოგიური მონაცემებიც.

  რაც შეხება სამკაულებს: ეკლესიაში სამკაულებით გადაპრანჭული შესვლა მიუღებელია. სხვა ვითარებაში კი ქრისტიანი ქალი საკუთარ ზომიერების გრძნობას, ინტუიციის კარნახს უნდა ეყრდნობოდეს.