შურიანობის ცოდვა

  დემონს თავისი მსგავსი დემონისა არ შურს, არც - სხვა ეშმაკისა; შენ კი, ადამიანო, გშურს ადამიანისა, შენივე თანატომელისა და თანამოძმის წინააღმდეგ აღმდგარხარ, რასაც არ აკეთებს ეშმაკიც! რა შენდობა გექნება, ანდა - რა გამართლება!

 

* * *

   მოშურნე სხვის უბედურებას საკუთარ ბედნიერებად მიიჩნევს, სხვის კეთილდღეობას კი - საკუთარ წარუმატებლობად.

 

* * *

   ღარიბი იმდენად არ არის განაწყენებული თავისი სიღარიბით, რამდენადაც - შურიანი - მოყვასის კეთილდღეობით; რა შეიძლება იყოს ამაზე საძაგელი?

 

* * *

   შურიანი საკუთარ თავს მეტად ვნებს, ვიდრე იმას, ვისიც შურს.

 

წმიდა იოანე ოქროპირი

 

 

* * *

   ვინც შური მოიპოვა, მასთან ერთად მოიპოვა დემონიც.

 

წმიდა ისააკ ასური

 

 

* * *

   თუ ძაღლებს აჭმევენ, ისინი მორჩილნი ხდებიან; როდესაც ლომს უვლიან, თვინიერდება; შურიანები კი უფრო მეტად მძვინვარდებიან, როდესაც მათ სიკეთეს უკეთებენ.

 

* * *

   შური არის მწუხარება სხვის სიკეთეზე.

 

* * *

   შური უსამართლო ვნებაა, რადგან აღაშფოთებს ყველა კეთილის სიმშვიდეს, და სამართლიანიცაა, რადგან აშრობს მის საკვებს.

 

წმიდა გრიგოლ ღვთისმეტყველი

 

 

* * *

   ნუ გშურს ცოდვილის დიდება, რადგან არ იცი, როგორი იქნება მისი ბოლო.

 

სიბრძნე ზირაქისა, თ. 9-10

 

 

* * *

   ნუ წაართმევ შურით აღვსილი ვინმეს იმას, რაც მისთვის ღმერთს მიუცია და ნურაფერს მიითვისებ ამპარტავნებით, რამეთუ არავის ძალუძს რაიმეს მოპოვება, თუკი ღმერთი არ უბოძებს, რადგან ყოველი ძალაუფლება და პატივი ღვთისგანაა.

 

* * *

   შური ჩრჩილს ჰგავს, რომელიც იმ სამოსს აფუჭებს, რომელშიც დაიბადა. ასევე იგი ჭამს იმ გულს, რომელშიც იბადება.

 

წმიდა დიმიტრი როსტოველი

 

 

* * *

   როგორც იქედნე დაბადებისას მშობელს კლავს, ასევე შურიც ღრღნის სულს, რომელიც მას აწვალებს.

 

* * *

   როგორც ჟანგი ჭამს რკინას, ასევე შური - სულს, რომელშიც იგი ცხოვრობს.

 

* * *

   შურიანი არაფრით განსხვავდება ადამიანისაგან, რომელიც არაფრით არაა დაფარული და რომელსაც ყველანი ისრებს სტყორცნიან.

 

წმიდა ბასილი დიდი

 

 

* * *

   როდესაც ხედავ სიმდიდრეს ანდა - დიდებას, ან - საერო ხელმწიფებას, იფიქრე იმაზე, რომ ისინი ხრწნადია და საცდურს თავს დააღწევ.

 

წმიდა ნილოს სინელი

 

 

* * *

   სად უნდა იპოვოს კაცმან ადგილი ისეთი, რომ შურის მწერავს თვალსა განერეს? - ვერსადა, ვგონებ, თვინიერ საფლავისა, რადგან ყოველგან მიწვდების თვალი მეშურნისა ძმის ბედნიერების შავის ლაქის დამკვრელად. ან ვითარ შესძლოს კაცმან ცხოვრება, რომ შურსა განერეს?! - შეუძლებელია.

 

წმიდა ალექსი ბერი

 

 

* * *

   ყველა სნეულებას და მათ შორის შურსაც, თავისი წამალი აქვს, - წამალი შურისა ქრისტეს სიყვარულია. შურსა და სიძულვილს ქრისტიანული სიყვარული აუძლურებს.

 

* * *

   შური არის მწუხარება, რომელსაც კაცი მაშინ განიცდის, როდესაც მოყვასის სიკეთეს, წარმატებასა და ბედნიერებას ხედავს.

 

წმიდა გაბრიელ ეპისკოპოსი

 

 

* * *

   შური ამპარტავნების შვილია; მოუკალი დედა და შვილიც მოკვდება.

 

ნეტარი ავგუსტინე

 

 

* * *

   შური და სიძულვილი დახშვიან ზეცას, აბრმავებენ გონიერებას, აბნელებენ სულს, ამძიმებენ სინდისს და ამწუხრებენ ღმერთს ადამიანის გამო და განახარებენ ეშმაკთ.

 

წმიდა დიმიტრი როსტოველი

 

 

* * *

   შური სიხენეშისა ეშმაკთა თანა ქვესკნელად ჯოჯოხეთისად შთაიყვანებს, ვითარ იგი სიცრუისა მღვდელნი შთახადნა ქვესკნელთა შინა ჯოჯოხეთისათა.

 

წმიდა ანტონ ჭყონდიდელი