ნუ დაკმაყოფილდები მხოლოდ მარხვით, ლოცვით, აღსარების თქმით

   რით უნდა დასრულდეს, რა შედეგი უნდა ჰქონდეს შენს მარხვას, ლოცვას, აღსარებას? რით უნდა დამთავრდეს თქვენი ამდენი შრომა, მოთმინება, ყოველი ნუგეშისაგან განშორება, ლოცვა, სულთქმა, ცრემლი, თუკი ღმერთმა ვინმეს ცრემლი მისცა? ერთი სიტყვით, რას ველოდებით? რისთვის ავიღეთ ჩვენს თავზე ამდენი ღვაწლი? ამ ყველაფრის მიზანი უნდა იყოს ეს: "მოაკვდინენით უკვე ასონი თქვენნი ქვეყანასა ზედა, სიძვა, არა წმიდება, ვნება, გულისთქმა ბოროტი... განიშორენით ყოველივე რისხვა, უკეთურება, გმობა, უშვერი სიტყვა... შეიმოსეთ ახალი იგი განახლებული მეცნიერება, მსგავსად ხატისა მის დიდებულებისა მისისა’’.

   მტკიცედ და გადაწყვეტილად თქვი შენს გულში: მეყოფა მე ამდენი ცოდვის მონობა, საკმარისი არის ჩემთვის ისიც, რაც აქამდე ცოდვა ჩამიდენია. ამიერიდან აღარ უნდა ვიყო მე ცოდვის მონა.

   ნუ გაქვს იმედი, რომ მარხვა დიდი მსხვერპლია ღვთის წინაშე, თუ არ მოაკვდინე შენში ცოდვა, თუ არ განახლდი სულიერად არც მარხვა, არც მრავალი გრძელი ლოცვის მოსმენა, არც ბევრი მეტანიის კეთება, არც აღსარების თქმა, არ გაცხოვნებს შენ, თუ სრულიად არ განეშორე ცოდვას, თუ არ მოკვდა შენში ის მატლი ცოდვისა, რომელიც ჭამს შენს გულს. ნუ დაკმაყოფილდები მხოლოდ მარხვით, ლოცვითა და აღსარების თქმით. იმის დასამტკიცებლად, რომ შენ გულწრფელად გსურს მოაკვდინო ცოდვა შენში, შეიმოსე ახალი განახლებული ცხოვრება, აღასრულე, რომელიმე კეთილი საქმე. თუ ვინმესთან უკმაყოფილება გაქვს, ანუ მტრობა, მას გულწრფელად შეურიგდი. თუ შენს გულში გრძნობ, რომელიმე ცოდვას, განიშორე იგი და მოიძულე. თუ იცნობ ვინმეს საწყალს, გაჭირვებულს, ანუგეშე იგი შეძლებისდაგვარად.

   ერთი სიტყვით, ახლავე დაიწყე ნაყოფის გამოღება, ახლავე მიეჩვიე სიკეთის კეთებას და ღმერთს აჩვენე შენი ერთგულება და მორჩილება. ამინ.