ცილისწამება

 

   არა ცილი სწამო (ლუკ. 18, 20; იხ. გამოსლ. 20, 16) - მცნება უფლისა, რომელიც ჩაწერილია ორივე, ძველსა და ახალ აღთქმაში; ხუმრობა არ არის - მისცე ცრუ ჩვენება უფლისა და მისი ანგელოზების წინაშე. ხუმრობა არ არის ქუდმოხდილი წარსდგე ჯვრისა და სახარების პირისპირ და წამოიძახო: ცოცხალ და ყოვლისშემძლე ღმერთს ვფიცავ, რომ ეს ჭეშმარიტება - სიცრუეა: ანდა, ეს სიცრუე - ჭეშმარიტებაა. და დაე, ჩემი სიმართლისამებრ მომაგოს უფალმა! გასაკვირი არაა, რომ ღმერთი ჭეშმარიტებისა და სიმართლისა შოლტავს თავის ცრუმოწმეთ, ვის ხელებს, ვის ფეხებს, სხვებს თვალებს, ზოგიერთ ოჯახს და ახლობლებს.

 

წმიდა მღვდელმთავარი ნიკოლოზ სერბი (ველიმიროვიჩი)

 

 

   დემონი - ცილისმწამებელია, რამეთუ ღმერთს ცილს სწამებს, როცა სულს ურწმუნოებით გმირავს; ის ჩვენს ახლობლებს სწამებს ცილს და ჩვენს ურთიერთსიყვარულს ანგრევს. ის ჩვენც ცილს გვწამებს ადამიანთა მეშვეობით, რითაც გულს გვიქვავებს და გონებას ბოროტი აზრებით გვივსებს.

 

არქიმანდრიტი რაფაელი (კარელინი)

 

 

   ნურასდროს მიიღებ შენს გულში ცილისწამებასა შენი ძმის მიმართ. არამედ გააჩერე განმკითხველი და უთხარი: „დამეხსენ, ძმაო, თავად ყოველდღე უფრო მძიმედ ვსცოდავ, როგორღა უნდა განვიკითხო სხვები?"

 

წმიდა იოანე ოქროპირი

 

 

   რად შფოთდები, საყვარელო ძმაო, ცილისწამებისათვის შენზედა წყალობით ღმრთისაგან მოვლინებულისა, რად არ შეიწყნარებ ამ დიდებულს ჯილდოს მაცხოვრის მარჯვენისაგან განჩინებულს, რამ დაგავიწყა გზა წმიდანებისა და ვალიცა თანა ნადებისა შენისა, რომ მრავალთა შენთა ცოდვათათვის გერგოს ეს ცილისწამება, რათა ესრეთ უმართლო დასჯა გექმნას განსაკუთრებულ შენთა შეცოდებათა და უფროსად დამაგვირგვინებელიცა. რამ დაგავიწყა სიტყვა მაცხოვარისა: „რომლითა განიკითხოთ, მითვე განიკითხნეს". აი მონაგები შენი სხვებზედ განკითხვისა, რომელიც სამართლად მოგევლინა; ამისთვის ნუ სწუხხარ უგულისხმოდ, რამეთუ ნაშობი არს შენის სხვისადმი შეცოდებისა. ანუ არა მიხედავ მართალსა იესოს, თუ ვითარ თავს იდებს სმასა ნაღვლისასა ცილისწამებითა და ზიდავს ჯუარსა... რამ დაგავიწყა, საყვარელო ძმაო, სიტყვა ნეტარეული მაცხოვრისა: „ნეტარ იყვნეთ თქვენ, რაჟამს სთქვან ყოველი სიტყვა ბოროტი თქვენზედა, გიხაროდენ და მხიარულ იყვნეთ, რამეთუ სასყიდელი თქვენი ფრიად არს ცათა შინა".

   შთაიხედე შენს გულში, სადაც ამ ცილისწამების შესახებ სიმართლე სუფევს და აღიხედენ გულთმხილველისკენ და ის მოფენს სიტკბოების ნათელს ამ ცილისწამებისათვის სენს მართალ გულში, თუ რომ შენ ღირსად შერაცხავ შენს თავს, ვითარცა ცოდვების შენის კანონად მოვლენილისა. რას მისდევ ხმასა უმეცართასა, ოდეს ხმასა ყოვლისა მეცნიერის მადლისასა ეგულვების გამოცხადება ყოველთა დაფარულთა გულთასა და მაშინ იყოს დიდება სიმართლისა.

 

წმიდა ალექსი ბერი

 

 

   ცილისმწამებლის სიტყვები ნუგბარი საჭმელივითაა და მუცლის შუაგულამდე აღწევს.

 

იგავნი სოლომონისა, თ. 17-18

 

 

   წყეულიმც იყოს დამსმენი და ცილისმწამებელი, რადგან ბევრი მშვიდობიანი ხალხები დაღუპეს.

   მესამე ენამ ბევრი შეარყია და დევნა ისინი ხალხიდან ხალხში; მტკიცე ქალაქები დაარღვია და დიდებულთა სახლები დაამხო.

   მესამე ენამ ქველი დედაკაცები განდევნა და მოწყვიტა ისინი თავიანთ ნაჯაფარს.

   მოსვენებას ვერ იპოვის ჭორის მსმენელი და მშვიდად ვერ იცხოვრებს.

   შოლტის ცემა წყლულებს აჩენს, ენით ცემა კი ძვლებს შემუსრავს.

   მრავალნი დაეცნენ მახვილისგან, მაგრამ უმრავლესნი ენით.

 

სიბრძნე ზირაქისა, თ. 27-29

 

 

Xareba.net - ის რედაქცია