მეცნიერება

 

   არიან მეცნიერნი ცალმხრივნი, რომელთა შეისწავლეს მხოლოდ სტიხიონთა ძალები რაოდენად მაინც, მაგრამ თავის სულიერ ძალების შემეცნებაში დიდ ნაკლულევანებას იჩენენ. ამისთვის იგინი ცალი თვალით ვლენან და ვერ ხედვენ სისწორით და სისრულით სწავლა-მეცნიერების არსებითს გვამს, რამეთუ სამოსელსა ებღაუჭებიან და შინაგანის კაცისა აღსავალი ვერ ცნეს. სწავლული, რომელიც ზნეობრივად სულიერ სიმაღლეს, სიმართლეს, გულმშვიდობას, კაცთმოყვარებას, მოწყალებას, სიწმიდეს არ აქცევს ყურადღებას, მას დაუფვლია მისი მეცნიერება მწვირეში და რა ვსთქვათ, ნუთუ გმობა არ იქნება და ცრუ ფარისევლად არ გამოვჩნდებით ჭეშმარიტების წინაშე, რომ ასეთ სწავლულთა უწოდოთ განათლებული?

 

წმიდა ალექსი ბერი

 

 

   აღსანიშნავია რომ თანამედროვე მეცნიერების უდიდეს აღმოჩენად ითვლება, კანონი დროისა და სივრცის ფარდობითობის შესახებ. უნდა ვიცოდეთ, რომ წმინდანები, რომლებმაც შრომითა და დიდი ასკეტური ღვაწლით მოიპოვეს სულიწმიდის მადლი, დროისა და სივრცის მფლობელნი არიან ე.ი. შეუძლიათ მყოფადიდან გადავიდნენ წარსულისა და მომავალ დროში. ამდენად მათ თავისუფლად იციან ადამიანთა წარსულიც და მომავალიც. არიან გულთამხილავები და იციან რას ფიქრობს და რა სურს ადამიანს, მაგრამ ყოველივე ეს უდიდესი სიმდაბლის გამო უმეტეს შემთხვევაში დაფარული აქვთ ადამიანთაგან.

 

მამა გაბრიელი

 

 

   თავისთავად მეცნიერება ღვთისგან ნაკურთხია. იგი ადამიანის ინტელექტის, ადამიანის, როგორც ღვთის ხატების, მიღწევაა. ამიტომაც მეცნიერების მონაპოვარი დალოცვილია და უნდა გამოიყენებოდეს პიროვნების სულიერი და ფიზიკური კეთილდღეობისათვის მხოლოდ და არა მის დასათრგუნად.

 

საქართველოს კათოლიკოს-პატრიარქი ილია II

 

 

   მეცნიერება და სარწმუნოება კი არ ეწინააღმდეგება ერთმანეთს, არამედ ისინი ავსებენ ერთმანეთს. ეს ჰარმონიული განვითარება უნდა იყოს ყოველ ადამიანში.

 

საქართველოს კათოლიკოს-პატრიარქი ილია II

 

 

   მეცნიერება და ტექნიკა თავისთავად ბოროტების მომტანი არ არის, თუ ის მორწმუნე, კეთილი ადამიანის ხელშია. მაგრამ, მეცნიერება და ტექნიკა ძალიან საშიშია არასულიერი და ურწმუნო ადამიანის ხელში. მაშინ მეცნიერება და ტექნიკა შეიძლება იქცეს მთელი კაცობრიობის მომსპობ და გამანადგურებელ იარაღად. ამიტომ, დღეს განსაკუთრებით ვთხოვთ უფალს, რომ ღმერთმა ხალხს დაუბრუნოს ჭეშმარიტი რწმენა და სიბრძნე.

 

საქართველოს კათოლიკოს-პატრიარქი ილია II

 

 

   მეცნიერება და ხელოვნება უნდა ემსახურებოდეს იმ ღვთიურ მადლსა და სიკეთეს, რომელიც ნერგავს ხალხთა შორის პროგრესს, სიხარულს, რწმენას, სიყვარულსა და ურღვევ მეგობრობას.

 

საქართველოს კათოლიკოს-პატრიარქი ილია II

 

 

   მეცნიერება ღვთის სიბრძნეა, ხოლო განათლება საღმრთო ბუნება, რომლის არსებითი მნიშვნელობა ნათლის მფენაობაა, რომლის დისკოში არა კერძო ერთ-მხარე შესწავლა შეიცავს განათლების სიდიადეს, არამედ მას შინა ყოველ მხრივ აღვსებითნი განხილვანი მოეთხოვებიან განათლების სიდიადით გამსჭვალულ მეცნიერს.

 

წმიდა ალექსი დიდი

 

 

   მეცნიერებაც და რელიგიაც ორი საშუალებაა ობიექტური რეალობის შესაცნობად და ისინი ხელს უნდა უწყობდნენ ჭეშმარიტების გზით კაცობრიობის განვითარებას.

 

საქართველოს კათოლიკოს-პატრიარქი ილია II

 

 

   ყოველგვარ ბოროტებას გონება შობს, როდესაც იგი მხოლოდ მეცნიერებით იკვებება და სრულიად განშორებულია ღმერთს. ამიტომაა, რომ ასეთი ადამიანები შინაგან სიმშვიდესა და წონასწორობას ვერ პოულობენ, მაშინ, როცა ადამიანების გონება ღვთის გარშემო ტრიალებს, მეცნიერებსაც საკუთარ თავზე და სამყაროს საკეთილდღეოდ შინაგანი შრომისათვის იყენებენ და ამიტომ მათი გონება განათლებულია.

 

მამა პაისი მთაწმინდელი

 

 

 

Xareba.net - ის რედაქცია